shkruan: Naser Pajaziti
Lobisti shqiptaro-amerikan dhe kryetari i LQSHA (Liga Qytetare Shqiptaro-Amerikane), arbëreshi, Joseph DioGuardi këto ditë vizitoi Kosovën.
Erdhi shkoi pa shumë bujë, por me shumë punë, aktivitete, duke lënë amanete dhe porosi të qarta… Pata rastin ta takoj dhe të ndërroj ca fjalë, duke e dëgjuar me interes të lartë çdo fjalë të tij.
Edhe pse në moshë 83 vjeçari, Joe siç e thirrnin miqtë e tij, ende është me çiltërsi dhe kthjelltësi të rrallë, tejet vital, aktiv, i pandalshëm dhe këmbëngulës në synimet dhe porositë e tij.
Ai ma vulosi bindjen se është një diplomat dhe politikan shumë i rrallë, i rangut të lartë, me stil amerikan, i prerë, i vendosur dhe shumë i qartë për çdo çështje.
E njihte në thelb çdo çështje dhe histori të kalvareve dhe zhvillimeve nga Presheva e deri në Çamëri. Se kah po shkojnë, çka po lëngojnë dhe çfarë duhet bërë?
Mu kujtua përkufizimi apo diagnoza që ka dhënë ai për politikën shqiptare se: “Kemi liderë të politikës që janë të korruptuar dhe kanë kontroll. Ne po luftojmë për t’i larguar ata, në Maqedoni, Kosovë dhe Shqipëri. Problemi është se kanë kapërcyer nga komunizmi, në korrupsion. Sllavët janë shumë të zgjuar. Ata blenë liderët shqiptarë. Sllavët dinë se si t’i përdorin paratë; ata dinë se si të bashkëpunojnë mes tyre dhe dinë se si të përdorin patriotizmin“, janë fjalët e tij që i kishte thënë në një intervistë të fundit për INA- Iliria News Agency.
Ai i njihte gjithë përfaqësuesit politik, i zhgënjyer me shumicën prej tyre, për shkak të shumë dështimeve, devijimeve, korruptimeve dhe tradhëtive. Por, edhe ata Joe-n nuk e duan, sepse këtë kastë politike të dekadave dhe të viteve të fundit në shtetet e trevat shqiptare ai i quan të korruptuar, hajna, tradhëtar dhe njerëz mashtrues që nuk kanë ideal e mision kombëtar. Politika e fuqishme diplomatike lobuese e DioGuardit dhe miqve të tij do vazhdoj të jetë ferrë në sy për gjithë këtë kastë të dështuar dhe të korruptuar.
Së fundi shumë e rëndësishme ishte seanca dëgjimore e majit në Senat, ku senatori Bob Menendez, në cilësinë e kryetarit të Komisionit të Senatit për Marrëdhënie me Jashtë ngriti zërin se çfarë po ndodhë me Kosovën dhe politikën dhelparake serbe ndaj saj, lojërat që synojnë rrënimin e kredibilitetit dhe shtetësisë së saj.
Por, aty është Joe DioGuardi dhe Liga Qytetare Shqiptaro-Amerikane me Shirley Cloyes DioGuardi si dhe aktivistët e tjerë që nuk kursejnë asgjë për ta çuar çështjen përpara. Ata aktivistë dhe veprimtarë që kanë shkrirë dhe po shkrijnë ende pasurinë e tyre dhe nuk kursejnë asgjë për çështjen tonë. Ata janë atdhetarët punëtorë që nuk rrahin gjoks, nuk lavdërohen dhe nuk krekosen shumë, por në zemrat e tyre është atdheu dhe përkushtimi i bazuar në thënien e presidentit legjendar amerikan Kenedi: Mos pyet se çfarë ka bërë Amerika për ty, por ti çfarë ke bërë për Amerikën?
Misioni i DioGuardit nuk do ndalet, është i pamposhtur dhe përkundër sfidave të ndryshme, ai vazhdon betejën lobuese diplomatikr duke qenë një gardian i çështjes sonë në Ballkan. Ai gjithnjë nuk harron dhe e rikujton amanetin e babait të tij – “Kudo që jeni dhe të punoni në Amerikë, mos harroni tokën dhe popullin shqiptar”. Ai nuk rri qetë, i pandalshëm duke u përgatitur për misionin e radhës diplomatik.
