Juventusi braktis projektin “Superliga Evropiane”!
Mediat spanjolle pretendojnë se Juventusi ka njoftuar Real Madridin dhe Barcelonën se po braktisin projektin e Superligës Evropiane, duke i dhënë fund një prej projekteve kryesore të ish-presidentit Andrea Agnelli dhe duke u përpjekur të “bëjë paqe” me UEFA-n për të shmangur një pezullim në garat evropiane.
Sipas gazetës spanjolle ‘Relevo’, dy klubet spanjolle kanë marrë një njoftim zyrtar nga Juventusi, duke lënë vetëm Real Madridin dhe Barcelonën në projektin që fillimisht u njoftua nga 12 klubet më të fuqishme të Evropës në prill të vitit 2021 dhe që supozohej të përfundonte me formimin e një lige elitare, si garë paralele e Ligës së Kampionëve.
Agnelli dhe i gjithë bordi i drejtorëve dhanë dorëheqjen gjashtë muaj më parë pas një hetimi të Prismas për vlerat e fryra të transferimeve të futbollistëve për të treguar një rritje artificiale të kapitalit të klubit. John Elkann, kushëriri i Agnellit dhe kreu i kompanisë mëmë ‘Exor’, ka marrë përsipër klubin dhe mesa duket po përpiqet të “korrigjojë” gabimet e Agnellit.
