Karateisti i njohur shqiptar, Berat Jakupi, ka reaguar pas ndarjes së Mirënjohjeve Nacionale Sportive nga ana e qeverisë së Maqedonisë së Veriut, ku sipas tij është padrejtësisht lënë jashtë, ndonëse ka arritje të larta ndërkombëtare.
Në një reagim të publikuar në rrjete sociale, Jakupi tregon se është kontaktuar nga shumë miq, kolegë dhe gazetarë që i kanë shprehur habinë për mos përfshirjen e tij në listën e të nderuarve.
“Sot jam kontaktuar nga shumë miq, shokë dhe gazetarë, të cilët më pyetën pse, si sportist, nuk jam ftuar nga qeveria për të marrë Mirënjohjen Nacionale Sportive (Pensionin Sportiv),” – shkruan Jakupi.
Ai rikujton se në vitin 2017, kur karateja ishte sport olimpik, ai ka fituar medaljen e argjendtë në Kampionatin Evropian për seniorë, një arritje e rrallë për sportin maqedonas.
“Duke u bazuar në rezultatet e mia sportive, që janë të shumta, dhe konkretisht vendin e dytë në Kampionatin Evropian për seniorë në vitin 2017 – kohë kur karateja ishte sport olimpik – si dhe duke marrë parasysh se në atë ceremoni morën pjesë edhe sportistë që ende janë aktivë dhe e përfituan këtë të drejtë, sipas ligjit, edhe mua më takon Pensioni Sportiv.”
Jakupi thekson se nuk ka marrë ende asnjë njoftim apo sqarim për arsyet e përjashtimit, duke e cilësuar këtë një padrejtësi që kërkon përgjigje nga institucionet përgjegjëse.
Ky reagim vjen në vazhdën e kritikave nga figura të shumta publike dhe sportive shqiptare, të cilët kanë ngritur zërin për mungesën e përfaqësimit të sportistëve shqiptarë në ceremoninë e fundit shtetërore, pavarësisht se shumë prej tyre kanë përfaqësuar me sukses Maqedoninë e Veriut në arenën ndërkombëtare. (INA)
