Kreu i Lëvizjes Besa, njëherë edhe kryetar i komunës së Tetovës, Bilall Kasami sot sërish komentoi idenë e kreu të VMRO-DPMNE-së që çdo javë në shkolla fillore të intonohet himni kombëtar i Maqedonisë së Veriut, shkruan TV21. Kasami thotë e në këtë rast, ose himni duhet të ndryshohet, që të ketë karakter multietnik, ose duhet që në vendbanimet me shumicë shqiptare, të intonohet edhe himni i Shqipërisë.
“Himni i shtetit nuk reflekton realitetin multietnik të shtetit dhe shoqërisë në Maqedoni të Veriut, për derisa është ky realitet atëherë ne kërkojmë, këtë qëndrim e kam dhënë si kryetar i komunës së Tetovës, nuk është që është koordinuar me partitë tjera, atëherë kjo nënkupton që ose duhet të ndërrohet himni i shtetit dhe të respektojë diversitetin kulturor dhe etnik, ose nëse bihet vendim që kështu si është të intonohet, atëherë duhet të respektohet përkatësia multietnike e shtetit dhe e shoqërisë dhe në vendet, komunat apo lokalitetet me shumicë shqiptare, si komuniteti i dytë shumicë, duhet të intonohet edhe himni shqiptar”, tha Kasami.
