Bilall Kasami është rizgjedhur për kryetar të Lëvizjes BESA në Kongresin e sotëm të dytë partiak të zhvilluar në Tetovë.
“Faleminderit gjithë delegatëve që më dhanë besimin për të udhëhequr edhe njëherë me Lëvizjen BESA!”, theksoi Kasami.
Sipas tij, Kongresi i sotëm i kësaj partie është dëshmi se Lëvizja Besa vazhdon edhe më fuqishëm.
“Sot ne jemi dëshmitarë që Lëvizja Besa vazhdon edhe më fuqishëm të artikulojë zërin e shqiptarëve, zërin e çdo qytetari të nëpërkëmbur nga pushtetet e kaluara”, tha Kasami duke shtuar se do të jenë krah i fuqishëm për të gjithë ata që kanë nevojë.
Duke folur për zgjedhjet parlamentare, që janë një kërkesë e këtij subjekti politik, Kasami nënvizoi se ato duhet të mbahen sa më shpejt dhe se subjekti i tyre politik është i gatshëm për bashkëpunim me opozitën shqiptare.
“Lëvizja Besa ka dëshmuar se është hapur për një bashkëpunim dhe bashkim të opozitës shqiptare por asnjëherë nuk kemi nguruar që edhe të vetëm të dalim në zgjedhje”, deklaroi Kasami.
Në këtë Kongres, sekretari i deritanishëm Arjanit Hoxha është zgjedhur zëvendëskryetar i Lëvizjes BESA. (INA)
https://www.facebook.com/KasamiBilall/posts/497187995110518
