Mbrëmë pranë qendrës tregtare “City Mall” në Shkup ka ndodhur një aksident trafiku, ku një vajzë e re është goditur nga një veturë. Për fat të mirë, ajo nuk ka pësuar lëndime fatale.
Sipas informatave nga Ministria e Punëve të Brendshme, në Bulevardin “Partizanska”, automjeti i tipit “Mini Morris” me targa të Shkupit, i drejtuar nga L.T. (19) nga Shkupi, ka goditur këmbësoren O.P. Pas aksidentit, ajo është dërguar për ndihmë mjekësore në Spitalin e Përgjithshëm “8 Shtatori”. Policia ka kryer hetime në vendngjarje, përcjell INA.
Bulevardi “Partizanska” konsiderohet si një nga rrugët më të rrezikshme në Shkup dhe shpesh përmendet si një “pikë e zezë” për aksidente.
Ndërkohë, një tjetër aksident trafiku ka ndodhur këtë mbrëmje në të njëjtin bulevard, afër objektit “Simpo”. Një veturë policie ka bllokuar dy nga tri korsitë e rrugës për shkak të hetimeve, duke shkaktuar kaos në komunikacion.
Ende nuk ka informacione nëse në këtë aksident të dytë ka persona të lënduar.(INA)
