shkruan: Sunaj Raimi
Çështja e Akademisë së Shkencave të Shqiptarëve në Maqedoni!
Mbrëmë në Lajme i dëgjova reagimet e disa ‘akademikëve’ maqedonas për nismën e fundit për themelimin e Akademisë së Shkencave të Shqiptarëve në Maqedoninë Veriore! Ato vërtetë ishin anakronike dhe ironike, me që me vite të tëra e përsërisin të njëjtin refren etnocentrist: në RMV ka vetëm një Akademi të Shkencave – ajo e Akademisë Maqedonase (MANU).
Mjaft më me këto justifikime të fshehura puroetnocentriste, ku vetëm 3-4 shqiptarë janë pranuar, sa për të thënë se – këtu kemi shqiptarë! Megjithëse, dorën në zemër, disa flokëthinjur tanë që prej vitesh janë anëtarë të MANU, deri sot thuajse asgjë s’kanë bërë për mbrojtjen e identitetit shqiptar të përbuzur! Të paktën tani të kishin dalë nga ‘zona e komforit’ duke u prononcuar si burra nëpër media se vërtetë e përkrahin këtë nismë të fellës akademike shqiptare, sepse në MANU zëri i shqiptarëve kurrë nuk është marr parasysh!
Unë si Profesor, e mbështes fuqishëm këtë iniciativë akademike me tërë kapacitetin tim intrlektual e moral, me shpresë se kësaj here vërtetë do të realizohet kjo nevojë imperative e kahershme e shqiptarëve të Maqedonisë! Dhe këtu duhet të inkuadrohen kuadro cilësorë të moshës së re dhe të pjekur, të dëshmuar me vepra, e jo vetëm pensionistë! Pjesëtarë të kësaj Akademie duhet të jenë ata shkencëtarë e artistë shqiptarë, që përveç posedimit të rezultateve të dalluara në shkenca dhe në arte, duhet të jenë të guximshëm që edhe ta mbrojnë e përparojnë qeniesimin shqiptar me fakte e argumente shkencore, sa herë që e kërkon nevoja e momenti!
Andaj, le t’i japim përkrahje të parezervë themelimit të këtij institucioni të rëndësishëm shkencor për shqiptarët e RMV! Në këtë mënyrë do t’iu tregojmë të tjerëve se ne jemi po ai popull që kemi ditur ta themelojmë Universitetin e Tetovës nga hiçi, e tani do të dimë ta themelojmë e zhvillojmë edhe Akademinë e Shkencave të Shqiptarëve në Maqedoninë e Veriut, ku pritet që me dinjitet të jehojë hymni – Viva Akademia, Viva Profesores!
