Shkruan: Lulzim Nasufi
KOHA TË NDALOJMË DEMOKRACINË E XHEPAVE…!?
Në zgjedhjet e para pluraliste, qoftë ato lokale apo parlamentare, nuk e mbaj mend saktësisht, por ishte një periudhë e mbushur me entuziazëm. Kishte shumë votues, pak vendvotime, dhe migrantët vinin me aeroplanë dhe mjete të tjera për të votuar. Njerëzit qëndronin në radhë për orë të tëra dhe votonin me zemër. Kishte shpresë, kishte shpirt dhe vullnet. Votuesit votonin me dëshirë – dhe asnjë nuk ishte paguar, as kandidatët, as komisionerët, as votuesit.
E ÇKA NDODHI MË VONË…?
Më vonë, filluam të paguajmë komisionerët. Pas kësaj, filluam të paguajmë makinat që t’i nxjerrim votuesit në vendvotime. Më pas, vazhduam të paguajmë shtresat e margjinalizuara për t’ua marrë votat. Vazhduam me shantazhimin dhe kushtëzimin e votuesve dhe hallexhinjëve nga pushtetëmbajtësit.
E më pas, arritëm deri në pikën ku ,Pse të lodhemi të paguajmë makinat, shtresat e margjinalizuara, komisionerët, dhe shoferët kur mund të paguajmë thjesht ata që votojnë?
Kjo ka larguar demokracinë direkte të VULLNETIT të qytetarëve dhe ka instaluar demokracinë e xhepave.
Një gjë është e sigurtë – kjo nuk është demokracia për të cilën kanë nevojë qytetarët e Strugës.
Por sot, çfarë po ndodh? Çfarë duhet të ndodhë, sipas jush?
#MODEL TJETËR PËR STRUGËN…
