Chelsea dhe Tottenham Hotspur janë në kërkim të një trajneri të ri për sezonin e ardhshëm.
Të dy klubet londineze raportohet se janë në garë për Luis Enriquen, i cili është i lirë që prej largimit nga Kombëtarja e Spanjës në fund të vitit të kaluar.
Frank Lampard u emërua për herë të dytë si trajner i Chelseat pas shkarkimit të Graham Potterit, por kësaj radhe vetëm përkohësisht, deri në fund të këtij sezoni.
Pronari Todd Boehly po kërkon të sigurojë një trajner të profilit të lartë për të udhëhequr projektin e tij nga sezoni i ardhshëm.
Në anën tjetër, edhe te Spurs është një trajner i përkohshëm, Cristian Stellini, i cili po zëvendëson të shkarkuarin Antonio Conte.
Kësisoj, sipas raportimeve nga “Telegraph”, Tottenhami është i gatshëm të sfidojë Chelsean për Enriquen, me këtë të fundit që besohet se preferon më shumë “Blutë”.
52-vjeçari nuk ka drejtuar asnjëherë ndonjë skuadër angleze.
Përveç te Spanja, spanjolli ka udhëhequr edhe Barcelonën, Romën dhe Celta Vigon.
