Kompania “Metro” nga Shkupi që paketon dhe shërben tregjet tona me peshk të ngrirë dhe prodhime deti, por edhe me mish pule të ngrirë dhe produkte të tjera, vitin e kaluar arriti të hyra prej 20 milionë eurosh, thuhet në raportin e auditimit të publikuar në “Bursën e Maqedonisë”, përcjell portali Faktor.
Në tregun vendas janë realizuar hiç më pak se 12.5 milionë euro shitje.
“Metro” që vepron si shoqëri aksionare për vitin 2022 ka arritur një rezultat financiar më të mirë me rreth 2.2 milionë euro, edhe pse fitimi është modest në raport me të ardhurat dhe arrin në rreth 115 mijë euro. Ajo ka të punësuar 80 punonjës.
Pronarët e “Metro” janë Jovan Millosevski, Boshko Cvetanovski dhe Jovica Delevski me aksione prej 30 për qind, ndërsa Pravda Miloshevska dhe Stella Cvetanovska kanë aksione nga 5 për qind.
Rezultatet afariste të “Metro”-së i mundësuan që të investojë në një objekt të ri në Komunën e Petrovecit prej 3 milionë euro dhe të arrijë një borxh kreditor prej 7 milionë eurosh. Energjia elektrike që është paguar gjatë krizës energjetike vitin e kaluar ka qenë 560 mijë euro. Qeveria njoftoi më herët se “Metro” nga ky vit do të jetë pjesë e programit IPARD, për shkak të investimit të vazhdueshëm në modernizim dhe pajisje./Faktor
