Komuna e Tetovës përmes një deklarate është prononcuar lidhur me vendosjen e një kryqi gjigant në kishën “Shën Naumi i Ohrit – Çudibëris” në Kodrën e Diellit në Malësinë e Tetovës.
Nga kjo komunë thonë se inspektorët komunal kanë dalë në terren për të parë gjendjen dhe se komuna nuk ka dhënë leje.
”Komuna e Tetovës për të sqaruar opinionin publik nuk ka dhënë leje për ngritjen e kryqit në Kodrën e Diellit, duke shpallur se ai është vendosur pa lejen e duhur për ngritje. Inspektorët komunal kanë dalë në terren për të vërtetuar gjendjen faktike dhe për të kryer vlerësimin e situatës, sipas të cilave do të merren masat ligjore për të garantuar zbatimin e plotë të rregullave dhe procedurave. Pra, edhe një herë, Komuna e Tetovës edhe në këtë rast do të respektojë të gjitha procedurat ligjore, siç edhe ka vepruar çdo herë” – thonë nga Komuna e Tetovës lidhur me kryqin e ngritur gjigant me lartësi prej mbi 10 metra.(INA)
