Për shkak të përhapjes së sëmundjes virale “gjuha e kaltër” në territorin e vendit fqinj, ndërmerren masa kufizuese për të parandaluar përhapjen e saj në Kosovë, përfshirë ndalimin e importit dhe kufizimin e lëvizjes së bagëtive në zonat kufitare.
Agjencia e Ushqimit dhe Veterinarisë (AUV) ka njoftuar të mërkurën se ka vendosur të ndalojë përkohësisht importin e deleve dhe dhive nga Maqedonia e Veriut, pas konfirmimit të rasteve me sëmundjen virale “gjuha e kaltër” në territorin e vendit fqinj.
AUV ka bërë gjithashtu thirrje për fermerët kosovarë që t’i mbajnë nën vëzhgim tufat e tyre, sidomos ata që i dërgojnë bagëtitë në kullosa afër brezit kufitar me Maqedoninë e Veriut. Ata janë këshilluar të shmangin çdo kontakt të mundshëm me kafshët nga ana tjetër e kufirit dhe të zbatojnë me rigorozitet masat e biosigurisë në fermat e tyre.
“Të gjitha autoritetet të ndihmojnë në respektim të masave strikte kufizuese të lëvizjes se bagëtive të imta në kullosat e brezit kufitar. Fermerët mbajtës të deleve dhe dhive të respektojnë urdhëresat për të ruajtur shëndetin e tufave të tyre”, thuhet në njoftim, përcjell Albanian Post.
Ndryshe, sëmundja “gjuha e kaltër” është një infeksion viral jo ngjitës që transmetohet përmes pickimit të insekteve të llojit Culicoides. AUV është mobilizuar që të mbikëqyrë masat e vendosura dhe të parandalojë përhapjen e kësaj sëmundjeje në Kosovë.
