VMRO-DPMNE gënjen – kjo është përgjigjja e ish-ministres së kulturës, Bisera Kostadinovska Stojçevska, pas akuzave të partisë në pushtet, se ajo me para të popullit në udhëtim zyrtarë ka blerë arusha, topa futbolli, çorape, valixhe… Ajo thotë se ka blerë nga llogaria personale, pasi që aviokompania ia ka humbur bagazhin. Por nga VMRO-DPMNE pohojnë se për atë që ka blerë Kostadinovska – Stojçevska në fund ka marrë mjete buxhetore.
“Po, kam blerë valixhe të reja nga llogaria ime dhe pjesët themelore për udhëtime zyrtare që të mund të udhëtojë dhe të marrë pjesë në takimet në moment kur mbeta pa valixhe gjatë udhëtimit në Londër. Pjesa tjetër është manipulim i rëndë dhe plotësisht e pavërtetë”, tha Bisera Kostadinovska Stojçevska nga LSDM.
“Populli mund të shohë llogaritë e shpenzimeve tua me paratë e tyre, llogari të cilat më pas i ka dërguar në Ministrinë e kulturës me qëllim të arsyetimit të shpenzimeve”, u shpreh Mile Lefkov nga VMRO-DPMNE.
Ajo akuzoi se VMRO-DPMNE dëshiron të njollosë punën e saj dhe paralajmëroi padi kundër partisë nëse nuk vërtetohen parregullësi.
“Unë qëndroj në dispozicion. Nëse ka krim në punën time le të urdhërojnë të ma marrin imunitetin, kanë mundësi për këtë dhe do të paraqitem para cilitdo gjykatës që ata dëshirojnë”, shtoi Bisera Kostadinovska-Stojçevska.
Kryeministri Hristijan Mickoski, bëri thirrje që për këto informacione të reagojë Prokuroria publike.
“Jo vetëm për këtë rast. Unë thash se nga vjeshta do të jemi dëshmitarë për atë që ka ndodhur në 7 vitet e kaluara për shumë gjëra. Jo vetëm për këtë, ky është vetëm fillimi, do të ketë shumë njerëz që sot i shohim se janë të fuqishëm pas foltores së Parlamentit”, deklaroi kryeministri i vendit, Hristijan Mickoski.
Nga VMRO-DPMNE theksuan se edhe në periudhën në vazhdim do të publikojnë prova për, siç thonë, jetën luksoze me para shtetërore.
