Kryeministri Dimitar Kovaçevski sot u takua me përfaqësues të komunitetit të biznesit amerikan, të cilët janë të interesuar të investojnë në Maqedoninë e Veriut.
Delegacioni i biznesmenëve amerikanë u kryesua nga Eric Meyer, zëvendës shef i misionit në Ambasadën e SHBA-së në Shkup, si dhe përfaqësues të posaçëm nga Departamenti i Shtetit.
Temë e bisedës në takimin e sotëm ishin kushtet për investim në vend, veçanërisht në fushën e energjisë së gjelbër, si dhe përfitimet që vendi ofron për investitorët.
Duke përshëndetur interesimin e kompanive amerikane për investime në këtë vend, kryeministri Kovaçevski inkurajoi afaristët e pranishëm që të shqyrtojnë mundësitë për investime në sektorë të ndryshëm. Ai theksoi se Maqedonia tashmë njihet nga investitorët e tjerë si destinacion stabil dhe i sigurt për investime.
Kryeministri Kovaçevski i informoi të pranishmit se sipas legjislacionit aktual, mbështetja e përgjithshme financiare që mund të paguhet nuk mund të kalojë 50% të shumës së shpenzimeve të arsyetuara investive të realizuara. Ai përmendi lehtësimet për investitorët e huaj, si: kthimin e kostove të investimit, përjashtimin nga pagesa e taksave komunale tek vetëqeverisja lokale dhe tarifat e tokës për leje ndërtimi, si dhe lehtësimet në drejtim të taksave.
Në takim morën pjesë përfaqësues nga Exim Bank, Bezos Energy Innovation Fund, Siemens Energy, nënkryetari i Asociacionit Amerikan të Biznesit të Evropës Qendrore dhe të tjerë.(INA)
https://www.facebook.com/Dimitar.Kovachevski/posts/669283828534369
