Kryeministri Dimitar Kovaçevski njoftoi sot nga Ohri se do të kërkojë rishikimin e kontratës për ndërtimin e autostradës nga Ohri në Kërçovë.
“Mendoj se është e palejueshme të ndërtohet një autostradë 40 kilometra për mbi dhjetë vjet dhe ende të mos bëhet, ndërkohë që kërkohet një zgjatje tjetër që duhet të shkojë për votim para deputetëve. Për këtë arsye unë do të kërkoj një rishikim të këtij projekti dhe duke pasur parasysh që projekti nuk ka përfunduar për dhjetë vjet për një sërë arsyesh, mendoj se duhet menduar në drejtim të ndërprerjes së kontratës dhe kërkimit të një kontraktori i cili do ta ndërtojë në mënyrë cilësore, e të mos shohësh dhjetë vjet të ndërtohet një rrugë, të investohen para dhe të mos jetë lëshuar asnjë metër autostradë”, tha Kovaçevski.
Ai përkujtoi se projekti është ndërtuar sipas një marrëveshjeje të votuar në Kuvend, praktikisht bëhet ligj dhe çdo ndryshim apo aneks miratohet sërish nga deputetët.
“Një nga opsionet është, natyrisht, ndërprerja e kontratës”, theksoi kryeministri Kovaçevski, ndërsa paralajmëroi edhe një auditim të mundshëm të specializuar të projektit dhe të gjitha lëshimet.
Edhe zëvendëskryeministri i parë Artan Grubi shprehu vërejtje dhe kritika serioze për dinamikën e ndërtimit të autostradës Ohër-Kërçovë, duke theksuar se është e papranueshme që ky seksion nuk ka ka përfunduar pas dhjetë vjetësh nga fillimi i punimeve të ndërtimit.
“Ndërtimi ka filluar në vitin 2013 me 400 milionë euro, sot është mbi 600 milionë euro dhe as një metër asfalt nuk është vënë në përdorim. Afati skadon në fund të vitit dhe mendoj se është koha që qeveria dhe parlamenti ta rishikojnë atë marrëveshje, ndaj nëse është e nevojshme le të ndërpritet dhe le t’i jepet dikujt tjetër sepse kjo tashmë është skandaloze dhe e papranueshme”, theksoi Grubi duke thënë se do të duhet të ketë procedim penal.
Seksioni autostradë Ohër – Kërçovë është pjesë e Korridorit 8, me gjatësi totale prej 57 kilometrash, projekt ky me çmimin e të cilit nga 374 milionë që ishin parashikuar fillimisht, arriti në 598 milionë euro. Ndërtimi i autostradës ka nisur në shkurt të vitit 2014 dhe pas disa aneksimeve dhe shtyrjeve të afateve është paraparë të përfundojë plotësisht deri në fund të këtij viti.(INA)
