Kreu i Kuvendit, Afrim Gashi sot ka zhvilluar takim me kryeministrin hungarez, Viktor Orbán, i cili po qëndron për vizitë zyrtare në Maqedoninë e Veriut.
“E falënderova Hungarinë për mbështetjen e vazhdueshme në rrugën e integrimit evropian të vendit, që është padyshim rezultat i marrëdhënieve që vendet tona kanë ushqyer që nga vendosja e marrëdhënieve diplomatike në vitin 1994. E informova për themelimin e Grupit për Bashkëpunim me Hungarinë në fillim të mandatit dhe i bëra ftesë Kryetarit të Parlamentit hungarez që të vizitojë vendin, duke theksuar se bashkëpunimi mes dy parlamenteve duhet të thellohet dhe zhvillohet në të gjitha nivelet, përmes vizitave kthyese presidenciale, grupet për bashkëpunim, deputetë dhe zyrtarë”, thuhet në një njoftim të shkurtër mbi këtë takim. (INA)
