Kryetari i Komunës së Fushë Kosovës, Burim Berisha, priti në zyrën e tij Muharrem Salihu, përfaqësues i komunitetit shqiptar nga Lugina e Preshevës, Medvegja dhe Bujanoci, si dhe president i organizatës humanitare AFEDS. Kjo organizatë ka si mision adresimin e shkeljeve sistematike të të drejtave të shqiptarëve në këtë rajon, veçanërisht përmes denoncimit të represionit administrativ dhe pasivizimit të adresave nga autoritetet serbe, njofton komuna e Fushë Kosovës.
Muharrem Salihu, një afarist i suksesshëm dhe pronar i 12 restoranteve dhe hoteleve në qytetin e Venecias, Itali, është gjithashtu kandidat për deputet në Parlamentin Evropian në zgjedhjet e vitit 2024, përfaqësuar nga shteti i Italisë.
Vizita e tij kishte për qëllim shprehjen e mirënjohjes ndaj Kryetarit Burim Berisha dhe institucionit komunal për përkrahjen e vazhdueshme ndaj komunitetit shqiptar të zhvendosur nga Lugina e Preshevës, Medvegja dhe Bujanoci, të cilët pas luftës kanë gjetur strehim dhe mbështetje në Komunën e Fushë Kosovës.
Të dyja palët u dakorduan për intensifikimin e bashkëpunimit dhe përkrahjes institucionale në të ardhmen, me qëllim të fuqizimit të pozitës së këtij komuniteti dhe mbrojtjes së të drejtave të tyre themelore. (INA)
