Përmes Kryqit të Kuq janë mbledhur 54 milionë denarë për familjet e viktimave në tragjedinë e Koçanit. Sekretari i përgjithshëm, Sait Saiti tha se është vendosur që çdo familje të marrë nga 150 mijë denarë si ndihmë fillestare. Ai deklaroi se paratë deri më tani janë grumbulluar nga qytetarët nga Maqedonia dhe jashtë vendit, kompanitë, pushtetet lokale dhe institucionet shtetërore, por siç tha emrat do të bëhen të ditur pas përfundimit të fushatës së donacioneve, e cila do të zgjasë edhe dhjetë ditë.
“Duhet ta keni parasysh që organizata e kryqit të kuq duhet t’i respektojë të gjitha ligjet që e rregullojnë këtë pjesë të punës në shtetin tonë. Atë që e kemi si organizatë për borxh do të thoja që në periudhën e ardhshme jemi të organizuar me ekipet tona, jemi të pranishëm edhe më tutje në terren edhe sa u takon ndihmës së parë psiko-sociale. Ekipet tona në bashkëpunim me ministrinë e arsimit morëm përsipër që 60 ditët e ardhshme të japim ndihmë humanitare, të japim para se gjithash ndihmë sociale shkollave të komunës së Koçanit dhe të gjithë shkollave që gravitojnë përreth Koçanit”, tha Sait Saiti, drejtor i Kryqit të Kuq.
