Rusët e pasur janë të preokupuar me transferimin e të paktën një pjese të pasurisë së tyre nga Evropa në Dubai për të mbrojtur pasuritë e tyre nga sanksionet gjithnjë e më të ashpra kundër Rusisë për pushtimin e Ukrainës, thanë të enjten burime financiare dhe ligjore.
Dubai, një qendër financiare dhe biznesi e njohur për mungesën e rregulloreve të rrepta, ka qenë prej kohësh një magnet për ultra të pasurit në botë dhe refuzimi i Emirateve të Bashkuara Arabe (EBA) për t’u anuar me Perëndimin dhe Moskën ishte një sinjal për rusët që paratë e tyre do të ishin të sigurta.
Emiratet e Bashkuara Arabe abstenuan nga dënimi i pushtimit rus të Ukrainës gjatë një votimi në Këshillin e Sigurimit të OKB-së.
Emiratet, të cilat i kanë thelluar lidhjet me Rusinë vitet e fundit, nuk kanë vendosur sanksione të stilit perëndimor dhe as banka qendrore e Emirateve të Bashkuara Arabe nuk ka nxjerrë udhëzime mbi sanksionet nga Shtetet e Bashkuara dhe aleatët evropianë.
Në çdo rast, rusët e pasur aktualisht në Londër dhe Zvicër po përpiqen ta transferojnë pasurinë e tyre në siguri, tha një bankier në një bankë të madhe private zvicerane. Kjo u konfirmua nga një avokat në Dubai, i cili tha se kompania e tij kishte marrë pyetje nga individë dhe kompani ruse se si ata mund të transferonin shpejt “fondet e rëndësishme” me vlerë qindra miliona dollarë në vendin arab të Gjirit Persik.
“Emiratet e Bashkuara Arabe janë një vend i përshtatshëm (për biznes) – vetëm disa orë larg dhe pa një rregullator që është në marrëveshje me rregullatorët perëndimorë,” tha menaxheri i investimeve./Jutarnji.hr
