Kurti drejt Tiranës për t’i takuar udhëheqësit e rajonit, ndalon në Prizren për Lidhjen e Prizrenit (FOTO)

Kryeministri i Kosovës, Albin Kurti, ka bërë të ditur se është nisur për në Tiranë të Shqipërisë këtë mëngjes ku do të takohet me udhëheqësit e shteteve të rajonit.

Ai po ashtu ka bërë homazhe edhe tek përmendorja e pjesëmarrësve të Lidhjes së Prizrenit.

“Jemi nisur herët në mëngjes për në Tiranë, ku do të takohemi me udhëheqësit e shteteve të rajonit. Por sot është data e kryengjarjes së kombit tonë, përvjetori i Lidhjes që u mblodh në 10 qershor 1878 në Prizren. Ishte e domosdoshme të ndaleshim në Prizren për ta nderuar Lidhjen e veprimtarët e saj, gegë e toskë e të të gjitha bindjeve politike e feve, që vendosën të bëhen bashkë për mbrojtjen e njerëzve e trojeve të Atdheut.
Pas homazheve, vijuam rrugën për në Shqipëri, duke e patur përherë të qartë se cila është busulla jonë historike, ajo që na e tregon udhën e mbarë., ka shkruar Kurti në rrjetin social Facebook.