Pas vizitës në Beograd, i Dërguari i Posaçëm i Bashkimit Evropian për dialogun Kosovë-Serbi, Miroslav Lajçak do të qëndrojë në Prishtinë gjatë ditës së sotme.
Vizitën e Lajçak në Prishtinë për Reporteri.net e kanë konfirmuar dje nga Bashkimi Evropian.
Zëdhënësi i BE-së, Peter Stano tha se ky takim është pjesë e kontaktit dhe ndërveprimit të vazhdueshëm të Lajçak me partnerët për t’i ndihmuar të ecin përpara në Dialog.
“Mund të konfirmoj se i Dërguar Posaçëm për dialogun Kosovë-Serbi do të takohet me presidentin serb Vuçiq sot në Beograd dhe nesër do të jetë në Prishtinë për takime me homologët e Kosovës. Kjo është pjesë e kontaktit dhe ndërveprimit të tij të vazhdueshëm me partnerët për t’i ndihmuar ata të ecin përpara në procesin e Dialogut të lehtësuar nga BE”, tha Stano në një përgjigje dhënë për Reporteri.net.
Burime të Gazetës Online Reporteri.net bëjnë të ditur se Lajçak në Prishtinë pritet të takohet me kryeministrin Kurti.
I pari i Qeverisë do ta pres në takim emisarin evropian pasditen e së martës, në objektin e Qeverisë.
Gjatë ditës së djeshme pas takimit me presidentin serb, Aleksandar Vuçiq, Lajçak tha se me të kanë bërë një bilanc mbi gjendjen në dialog si dhe kanë folur edhe për hapat e ardhshëm në normalizimin e marrëdhëneve mes dy vendeve.
“Me të mbërritur në Beograd këtë mëngjes, u takova me Presidentin, Aleksandar Vuçiq. Në diskutimin tonë, u fokusuam në perspektivën strategjike për vitin 2024, bëmë një bilanc mbi situatën aktuale në dialog dhe folëm për hapat e ardhshëm në normalizimin e marrëdhënieve me Kosovën”, shkroi Lajçak në platformën “X”.
Lajçak, është takuar me edhe kryenegociatorin e Serbisë, Petar Petkoviq.
Ai paralajmëroi një takim midis dy kryenegociatorëve, Besnik Bislimi nga Kosova dhe Petar Petkoviq nga Serbia, i cili sipas tij mund të ndodhë së shpejti në Bruksel, për të vazhduar me negociatat.
Had an in-depth discussion with Serbia’s Chief negotiator @PetkovicPetar about a range of concrete Dialogue files. We also spoke about the prospects for a next Chief negotiators meeting in Brussels. pic.twitter.com/Efk95kV2NU
— Miroslav Lajčák (@MiroslavLajcak) January 29, 2024
