Ministri për Politikë Sociale, Demografi dhe Rini nga radhët e VLEN, Fatmir Limani, nuk e ka përjashtuar mundësinë që të kandidojë për kryetar të Komunës së Kërçovës në zgjedhjet lokale që do të mbahen këtë vjeshtë. Në një deklaratë për mediat, Limani konfirmoi se emri i tij është përfshirë në sondazhet e fundit që po zhvillohen nga opozita shqiptare.
“Emri im është duke u anketuar, është pjesë përbërëse e anketave që po bëhen edhe nga pala tjetër e opozitës. Nuk e përjashtoj këtë mundësi. Të gjithë e dimë se as Kërçova dhe asnjë komunë tjetër nuk janë çështje dëshire personale, por realitet i ndërtuar mbi kërkesat dhe nevojat konkrete të qytetarëve”, theksoi Limani.
Ai shtoi se çdo vendim do të merret në përputhje me vullnetin e qytetarëve dhe në koordinim me strukturat politike të koalicionit, duke lënë të hapur mundësinë që të dalë me kandidaturë zyrtare për të udhëhequr komunën.
“Ashtu siç do të vendoset nga strukturat përkatëse dhe nga qytetarët, ashtu do të prononcohemi në fund”, deklaroi Limani, duke lënë të kuptohet se kandidatura e tij do të varet nga dinamika politike dhe pritshmëritë në terren.