Ministri i Drejtësisë, Krenar Lloga ka shkarkuar nga detyra gjykatësin dhe kryetarin e Këshillit për koordinimin e teknologjisë informative dhe komunikuese (TIK) në organet gjyqësore, Llazar Nanev.
Ministri Lloga në një konferencë për media tha se ka iniciuar procedurë për hartimin e një rregulloreje të re për funksionimin e Këshillit të TIK-ut, në bazë të të cilit, siç ka paralajmëruar, do të formohet përbërja e re e këtij organi.
Ai sqaroi se pas marrjes dhe analizimit të materialeve për seancën e Këshillit Gjyqësor, ka konstatuar se këto materiale të dorëzuara përmbajnë pretendime të rënda për cenim të integritetit të gjykatësit dhe ekzistencën e një situate shqetësuese që vë në pikëpyetje sigurinë juridike të qytetarëve.
“Siç e kam deklaruar disa herë deri më tani, tani i qëndroj qëndrimit se Ministria e Drejtësisë dhe unë si ministër nuk do të lejojmë që personat për të cilët ka indikacione serioze të jenë anëtarë të trupave punues, këshillave dhe komisioneve që janë nën përbërjen apo kompetencën e kësaj Ministrie për dëmtim të integritetit”, theksoi Lloga.
Për shkak të mangësive të konstatuara në funksionimin e këtij organi, si dhe mangësive në aktet nënligjore që rregullojnë mënyrën e funksionimit të tij, Lloga tha se ka nisur procedurën për hartimin dhe miratimin e një Rregulloreje të re për mënyrën dhe përbërjen e TIK-ut. Nanev njëherit është edhe kryetar i Gjykatës Themelore të Kavadarit. (INA0
