Ministri i Drejtësisë në Maqedoninë e Veriut, Krenar LLoga ishte këtë të mërkurë i ftuar në një intervistë ekskluzive për Euronews Albania për të folur rreth asaj që duket si një përçarje e partisë “Aleanca për shqiptarët”.
Lloga tha gjithashtu se ai e dënon aktin e rëndë ku kreut të partisë ju vu një plumb në derën e shtëpisë, duke thënë se këto janë gjeste të ulëta të cilat i vuajnë shumë familjarët si të Arben Taravarit edhe të përfaqësuesve të tjerë të Aleancës.
“Kam qenë unë i pari që e kam dënuar këtë akt, ka pasur edhe referime mediatike që është vendosur nga një njeri i afërt i tyre. Unë e dënoj këtë akt. E kanë dënuar të gjithë aktivistët dhe funksionarët e Aleancës. cilado situatë për momentin është shumë e rëndë sepse familjarët tanë i vuajnë këto. Mund të jetë insituatë, por këtë e vuajnë familjarët e zotit Taravari, e vuajmë edhe ne. Nëse arrijmë në këtë nivel që të komunikojmë përmes këtyre veprimeve të ulëta atëherë do të jemi viktimë të gjithë e këtij degjenrimi politik. Unë uroj dhe shpresoj ta kalojmë lehtë nëse puna shkon deri te ndarja. Do të jenë organet gjyqësorë ato që do të përcaktojnë se kujt i takon Aleanca. Unë si sekretar i përgjithshëm do doja që Aleanca ta vazhdojë rrugëtimin e saj e vetme”,-tha ministri i Drejtësisë, Krenar Lloga.
Ai theksoi për Euronews Albania se është e vështirë që partia “Aleanca për shqiptarët” të mbijetojë megjithatë ai tha se ekziston mundësia që ditën e shtunë të sheshohet situata.
Sipas Llogës kryetari i partisë Aleanca për shqiptarët ka shkelur pjesë të vendimit të cilat janë votuar unanimisht brenda partisë. Ai tha se propozimi i Taravarit në Facebook i pakonssultuar me partinë, e cila me votë unanime ka zgjedhur të futet e vetme në zgjedhje, është anti-statutore dhe sjell përçarje.
