Ligji për amnisti e mori mbështetjen në procedurë qeveritare dhe për dhjetë ditë i njëjti ligj do të jetë para deputetëve në Kuvend. Unë vërtetoj se asnjë i zgjedhur apo i emëruar nga institucionet nuk do të përfshihet nga amnistia, gjithashtu as dhuna në familje dhe lëndë që lidhen me dhunën në familje nuk do të jenë pjesë e amnistisë. Pra po përsëritet ligji i vitit 2018, kur propozues ishin të gjitha partitë politike, përfshirë edhe VMRO-DPMNE-në, LSDM-në, BDI-në, Aleancën dhe të gjitha partitë e tjera politike që janë pjesë e Kuvendit, tha ministri i Drejtësisë Krenar Lloga.
Pret mbështetjen e të gjithë deputetëve dhe partive politike, sepse, siç tha, kjo nuk është vetëm për agjendën e përditshme politike, por është si rrjedhojë e vizitës së tij në burgun e Idrizovës.
“E patë edhe ju vetë se shteti nuk është në nivelin, të cilin e kërkon ligji dhe standardet që janë pjesë e sistemit tonë. Pres mbështetje dhe përveç albumit me foto nga vizita ime, do të blej edhe një pasqyrë, që çdo deputet të shikojë veten para se të votojë këtë ligj. Unë mbaj përgjegjësi për kushtet për këto gjashtë muaj, të gjithë të tjerët duhet të mbajnë përgjegjësi që nga viti 1945, e veçanërisht nga viti 1991”, tha Ministri i Drejtësisë Krenar Lloga.
Nëse shteti nuk ka mundësi të rehabilitojë personat me vepra më pak të rënda, atëherë, theksoi Lloga, ata do të duhet të kthehen në shtëpi si njerëz të dhunshëm ose si kriminelë.
“Nuk pres që do të bllokohet, sepse atëherë VMRO-DPMNE-ja dhe partitë e tjera do të duhet ta demantojnë vetveten që nga viti 2018. Ligji është i njëjtë, nuk janë shtuar, por janë përjashtuar veprat penale”, theksoi Lloga.
