Partia më e madhe në pushtet LSDM theksoi sot se Qeveria e re e udhëhequr prej tyre nënkupton efikasitet në punë, përgjegjësi dhe përkushtim në zgjidhjen e sfidave serioze me të cilat përballen qytetarët.
“Përveç profesionistëve të dëshmuar nga përbërja e mëparshme e Qeverisë, gati 70% e ministrave nga radhët e LSDM-së janë njerëz të rinj, kompetentë, të gatshëm për të marrë përgjegjësi në drejtoritë përkatëse.
Qeveria e re ka legjitimitet të plotë të fituar në zgjedhjet e fundit të 2020 dhe ka kapacitet për të dhënë rezultate në drejtim të tejkalimit të krizës energjetike dhe mbrojtjes së standardit të jetesës së qytetarëve”, thekson kjo parti, përcjell INA.
Më tej thuhet se LSDM vazhdimisht tregon kapacitet për ndryshim, për t’i shërbyer më mirë qytetarëve dhe shtetit, ndërsa VMRO-DPMNE nuk po ndryshon asgjë, në kryesinë lokale ende janë të pranishëm kuadro të vjetër të njohur, bashkëpunëtorë të Nikolla Gruevskit dhe përkrahës të regjimit.
“Përderisa LSDM vazhdimisht ndryshon, VMRO-DPMNE mbetet e njëjta parti destruktive që punon në dëm të qytetarëve”, thekson LSDM. (INA)
