LSDM sot i bëri thirrje Qeverisë që urgjentisht të marrë vendim për heqjen ose uljen e TVSH-së për rrymë dhe ngrohje, si ndihmë për qytetarët që ta kalojnë këtë periudhë të vështirë.
Zëdhënësja e LSDM-së, Bogdanka Kuzeska në konferencën e sotme për media theksoi se në muajin më të vështirë financiar të vitit, faturat për energji elektrike janë dukshëm më të larta në krahasim me muajt e kaluar.
“Rritja me 30 për qind e faturave të rrymës është një tjetër goditje e madhe çmimi për qytetarët, pas rritjes së çmimit të ushqimeve dhe ngrohjes. Faturat e larta astronomike të rrymës janë pasojë e drejtpërdrejtë e paaftësisë së qeverisë Mickoski dhe DPMNE. Me heqjen e subvencioneve të energjisë elektrike, VMRO-DPMNE goditi rëndë xhepat e qytetarëve. Të ballafaquar me faturat që arrijnë deri në 8.000, 10.000, 15.000 denarë, disa qytetarë kërkojnë mënyra për t’i paguar, ndërsa të tjerët kërkojnë korrigjime të faturave”, tha Kuzeska.
LSDM, sipas saj, ka zgjidhje dhe i bëri thirrje Qeverisë që urgjentisht të marrë vendim për heqjen ose uljen e TVSH-së për rrymë dhe ngrohje, si ndihmë që qytetarët ta kalojnë këtë periudhë të vështirë.
“Të lënë në mëshirë të fatit, njerëzit janë vendosur në situatë që të zgjedhin të paguajnë për rrymë dhe ngrohje ose të blejnë ushqim”, tha zëdhënësja Kuzeska.
