LSDM përmes një komunikate sërish i ka bërë pyetje publike kreut të partisë më të madhe opozitare VMRO-DPMNE, Hristijan Mickoski se a është për me BE-në, apo me LEVICËN (Të majtën).
“Përpara vendit tonë është një shans historik për të vazhduar rrugën evropiane dhe është përgjegjësi e të gjitha subjekteve politike t’i bashkohen kësaj rruge. Është e nevojshme të shfrytëzohet momenti dhe mbështetja e SHBA-së për të realizuar një qëllim tjetër strategjik – anëtarësimin e plotë në BE. Por edhe këtë herë, si edhe shumë herë më parë kur çështjet e rëndësishme zgjidheshin nga Hristijan Mickoski dhe VMRO-DPMNE, shohim mendjelehtësi, papërgjegjshmëri dhe ndryshim shumë të shpeshtë të qëndrimeve. Mickoski dhe VMRO-DPMNE duhet të vendosin dhe të thonë se çfarë kanë vendosur: nëse do të hyjnë në bllok për BE apo do të mbeten peng i së majtës. Ky është një moment i së vërtetës për Mickoskin, i cili ka javë të tëra që ikën nga përgjigjja në këtë pyetje dhe ndryshon çdo ditë qëndrim”, thekson LSDM.
Sipas kësaj partie, Mickoski në vend që të mashtrojë opinionin, duhet të zgjidhë pikëpamjet e tij, të dalë para opinionit dhe të thotë atë që ka vendosur: A është për BE-në apo do të vazhdojë në bllokun antievropian së bashku me të majtën? (INA)
