Nënkryetarja e LSDM-së, Kaja Shukova, në konferencë për media akuzoi se standardi i jetesës së qytetarëve është në rënie drastike, ndërsa Qeveria nuk po merr masa konkrete për përmirësimin e gjendjes ekonomike.
Ajo theksoi se çmimet e produkteve ushqimore bazë janë rritur për 30%, rryma është shtrenjtuar për 20 deri në 30% dhe prodhimi industrial ka rënë për katër muaj me radhë, përcjell TV21.
Sipas Shukovës, Qeveria jo vetëm që nuk ka strategji për parandalimin e rritjes së çmimeve, por as nuk i pranon masat e propozuara nga LSDM-ja.
“Nëse paga minimale nuk rritet në 500 euro, kjo do të nënkuptojë përkeqësim të mëtejshëm të jetës për mijëra familje, të cilat tashmë mezi ia dalin. Rritja e pagave është e vetmja mënyrë për të parandaluar varfërimin e mëtejshëm të qytetarëve dhe për të mundësuar përparim ekonomik. Pa këtë masë, qindra mijëra punëtorë do të vazhdojnë të punojnë për paga që nuk mjaftojnë as për shpenzimet elementare”, tha Shukova.
