Në Aeroportin Ndërkombëtar të Shkupit sot do të nis linja e re ajrore Frankfurt-Shkup e kompanisë gjermane “Lufthansa”, e cila do të shënojë hyrjen e kësaj kompanie ajrore në tregun e Maqedonisë së Veriut.
Siç informojnë nga TAV Maqedoni, hapja e linjës së re do të shënohet me uljen e avionit të parë të Lufthansa-s nga Frankfurti në aeroportin e Shkupit, përcjell INA.
Në këtë manifestim do të marrin pjesë ministri i transportit dhe lidhjeve Blagoj Boçvarski, ambasadorja gjermane në vend Petra Drexler, drejtori i përgjithshëm i TAV Maqedoni Metin Batak dhe drejtori rajonal i grupit Lufthansa Peter Pulem.
Linja e re ajrore nga Shkupi në Frankfurt realizohet me subvencione nga Qeveria. “Lufthansa” do të fluturojë nga Shkupi për në Frankfurt nga 23 prilli, dhjetë herë në javë.
Nëpërmjet Frankfurtit, udhëtarët nga vendi do të kenë mundësinë të lidhen me më shumë se 200 destinacione në disa vende të Evropës dhe botës.
Krahas “Lufthansa”, katër destinacione të reja janë marrë vesh me “Viz Air” hungarez, nga Shkupi në Luksemburg, Shtutgart, Salzburg dhe në Lubjanë. Wizz Air do t’i shërbejë katër destinacionet e reja tri herë në javë nga 1 nëntori i këtij viti.(INA)
