Kampionia e parë olimpike e Kosovës, Majlinda Kelmendi ishte e ftuar në Podcastin e kryeministrit të Shqipërisë, Edi Ramës.
Ajo foli për rreth karrierës së saj, shkruan Gazeta Express.
Majlinda tregoi se kishte pasur oferta milionëshe nga shtete tjera për t’i përfaqësuar, por përkundër që familja e saj ishte në vështirësi ekonomike, ajo nuk hoqi dorë nga Kosova.
“Unë jam një ndër ata sportistë që kam pasë oferta milionëshe prej shteteve tjera me i përfaqësu. Gjatë kohës kur mua më kanë ardhur ato oferta prej shteteve tjera, realisht familja ime ka qenë në një situatë shumë të vështirë ekonomike dhe nuk kam qenë e sigurt nëse vendimi është i duhur ose jo. Por, ndihem jashtëzakonisht krenare me veten dhe trajnerin tim sepse ka qenë ai që krejt kohën ka insistuar që ne me mbet në Kosovë edhe me përfaqësu Kosovën në arenën ndërkombëtare. Gjithmonë e them se nuk ia kisha falë asnjëherë vetes nëse medalja ime olimpike do të shkonte për një shtet tjetër e jo për Kosovën”, tha ish-xhudistja kosovare.
