Funksionarët e emëruar do të marrin paga më të larta prej gati 80 për qind derisa të gjendet një zgjidhje e përshtatshme.
Ata prej dje nisën të marrin rrogat e majme.
Sipas përllogaritjeve të reja në bazë koeficientit, deputetët do të marrin rroga deri në 2 mijë euro, kryeministri dhe ministrat me rroga mbi 2 mijë euro. Ndërsa kjo rritje gëzon edhe drejtorët, ku disa prej tyre me rritjen e re marrin rroga deri 3 mijë euro.
Kryeministri Dimitar Kovaçevski tha sot se do të shqyrtojë miratimin e një zgjidhjeje të re ligjore që do të mund të zvogëlojë rrogat e funksionarëve.
Sipas tij, tani nuk ka si të korrigjohet shuma e pagave, sepse vendimi i Gjykatës Kushtetuese është përfundimtar dhe nuk mund të ndryshohet me vendim të Qeverisë.
“Ministria e Punës dhe Politikës Sociale, në kuadër të kompetencave të saj, ka dhënë mendim negativ për iniciativën për ligjin për paga dhe përfitime të tjera për personat e zgjedhur dhe të emëruar, gjë që konfirmon qëndrimin se zgjidhja ligjore nuk duhet ndryshuar“, u shpreh Dimitar Kovaçevski.
Sa i përket rritjes së pagave të funksionarëve, kryeministri përmendi se edhe pagat e tjera për qytetarët janë rritur në mënyrë drastike.(INA)
