Ministrja e Mbrojtjes Slavjanka Petrovska theksoi se Maqedonia nuk do të dërgojë trupa, por ndihma ushtarake, përpos atyre humanitare. Sipas saj, kjo ndihmë ushtarake nuk do të zvogëlojë kapacitetet dhe armatimin e ARM-së.
“Vendimi për dërgimin e trupave tona në Ukrainë nuk do të ekzistojë. Si anëtare e NATO-s, ne do të respektojmë dhe zbatojmë të gjitha vendimet e marra brenda Aleancës, sepse jemi pjesë integrale e procesit të vendimmarrjes. Ndihma ushtarake për Ukrainën është në përputhje me kërkesat e autoriteteve ukrainase dhe bëhet fjalë për pajisje dhe armatime ushtarake”, theksoi Petrovska.
Nga ana tjetër Moska ka paralajmëruar se kushdo që furnizon Ukrainën me armë do të mbajë përgjegjësi.
Sipas vlerësimeve të fundit të Komisionerit të Lartë të OKB-së për Refugjatët, më shumë se 660 mijë refugjatë janë larguar nga vendi që kur Rusia nisi pushtimin e saj ushtarak në Ukrainë. Shumica e refugjatëve janë në Poloni, e ndjekur nga Hungaria, Moldavia, Rumania dhe Sllovakia. Edhe Maqedonia do të ofrojë kapacitete në varësi të mundësive, thotë Petrovska në rast se vendi gjendet në rrugën e refugjatëve nga pikat e nxehta ushtarake.(INA)