Në Shkup sot do të zhvillohet marshi protestues për drejtësi për rastin “Alfa” dhe zbardhjen e të vërtetës për vdekjen e Rexhail Qerimit, ish-luftëtarit të UCK-së, që për 13 vite u mbajt padrejtësisht në burg për këtë rast.
Marshi protestues do të nis nga ora 13:30 nga sheshi “Skënderbeu” dhe do të përfundoj pranë zyrës së Bashkimit Evropian.
Familjarët e të ndjerit por edhe familjarë të rasteve të tjera si “Monstra”, “Lagja e Trimave” kanë bërë thirrje për përkrahje dhe masovitet në këtë protestë.
“Të dashur bashkatdhetarë, ju njoftojmë se me datë 04.02.2022, të premten në ora 13:30 do të mblidhemi në sheshin “Skënderbeu” ku do ta fillojmë marshin në nder të Rexhail Qerimit dhe do të kërkojmë hetim ndërkombëtar në zyrat e BE-së për vdekjen e dyshimtë”, shkruan Jetulla Qerimi, vëllai i të ndjerit, Rexhail Qerimi.
Ata kërkojnë drejtësi dhe zbardhjen e të gjitha rasteve të montuara. (INA)
