Federata e Futbollit të Maqedonisë (FFM) zgjodhi sot presidentin e ri, Masar Omeragiq, në kuvendin e jashtëzakonshëm zgjedhor.
Si kandidati i vetëm në Kuvendin e sotëm, Omeragiq fitoi me aklamacion besimin e të gjithë delegatëve të pranishëm. Në takim ishin të pranishëm edhe legjendat e futbollit maqedonas, Goran Pandev, Ilija Najdoski, Agim Ibraimi, Gjorgi Hristov, Artim Shaqiri, të cilët në të ardhmen do të përfshihen në strukturat e FFM-së.
Para fillimit të pjesës zyrtare të Kuvendit, ish-presidenti Muammed Sejdini, përfaqësues të UEFA-s dhe FIFA-s folën dhe shprehën shpresën se futbolli në Maqedoninë e Veriut do të vazhdojë të zhvillohet.
Përfaqësues nga UEFA dhe FIFA i uruan kombëtares vendin e parë në Ligën e Kombeve dhe shprehën shpresën për një infrastrukturë edhe më të fortë për zhvillimin e futbollit.(INA)
