Kylian Mbappé lë pas momentin e keq me PSG-në, rikthehet të veshë fanellën e kombëtares së Francës dhe shkëlqen. Ai i ka hedhur poshtë kritikat e ditëve të fundit me një dopietë që rrëzoi Holandën dhe iu dha “Les Bleus” kualifikimin për në “Euro 2024”.
Fenomeni francez shënoi golat numër 41 dhe 42 për kombëtaren në 72 paraqitje gjithsej, duke arritur dhe më pas parakaluar në renditjen e golashënuesve të të gjitha kohërave të Francës një legjendë si Michel Platini.
Tani objektivi tjetër është shoku i tij i skuadrës, Antoine Griezmann (44 gola); Thierry Henry (51 gola) dhe Olivier Giroud (54 gola).
Mbappé e theu ngërçin fillimisht pas 7 minutash lojë me një goditje brenda zonës, por kryevepra e vërtetë e mbrëmjes së tij ishte goli i dyfishimit, me një gjuajtje me këmbën e djathtë që përfundoi nën këndin e sipërm të Verbruggen.
Dy perla që dërgojnë një mesazh të qartë për rivalët e tij, duke përfshirë Milanin në Champions League, i cili do të jetë mysafir në “Parc des Princes” më 25 tetor.
