Kryeministri Albin Kurti, në forumin “Globsec” në Bratisllavë, e konfirmoi se sapo ka përfunduar takimin me Përfaqësuesin e Lartë të BE-së për Politikë të Jashtme e Siguri, Josep Borrell dhe me emisarin për dialogun Kosovë-Serbi, Miroslav Lajçak.
Duke diskutuar në këtë forum, ai shpjegoi edhe pjesë të bisedës që ka pasur me Borrellin e Lajçakun.
“Unë iu thash atyre, se po të kishte protestë paqësore, për zgjedhje të parakohshme, do ta kishin mirëkuptimin tim”, shpjegoi Kurti se çfarë u kanë thënë zyrtarëve të lartë të BE-së.
“Por jo me turma që shkruajnë grafite me shkronjën “Z”, që hedhin ndaj ushtarëve granata e brohorasin ‘ubi, ubi’ që në gjuhën serbe do të thotë ‘vrite, vrite’”, tha kryeministri Kurti.
Ai përsëriti se nuk do të dorëzohet republika demokratike në duart e këtyre fashistëve.
“Nëse duan protestë paqësore, me kërkesë për zgjedhje të parakohshme, atëherë e kanë kryeministrin e tyre që tërë jetën ka qenë aktivist politik dhe shumë është i gatshëm që t’i dëgjojë, e ndoshta edhe të pajtohet me ta”.
LAJMI I FUNDIT: Nis takimi Kurti-Borrell-Lajçak në Bratisllavë
Ka filluar takimi mes kryeministrit Albin Kurti dhe Përfaqësuesit të Lartë të BE-së për Politikë të Jashtme e Siguri, Josep Borrell në Bratislavë.
Në këtë takim po merr pjesë edhe emisari për dialogun Kosovë-serbi, Miroslav Lajçak.
Burime të RTKlive konfirmojnë se takimi mes Kryeministrit Kurti, Borrellit e Lajçakut tashmë ka filluar.
Mbajtjen e një takimi të tillë e ka konfirmuar edhe zëdhënësi i Qeverisë së Kosovës, Përparim Kryeziu.
Ai ka thënë se qëndrimi i Kurtit në Bratislavë do të jetë njëditor e ku do të marrë pjesë edhe në ditën e fundit të Konferencës për Siguri Globale në Bratislavë-Globsec.
Një ditë më parë, kryeministri Kurti kishte anuluar pjesëmarrjen e tij në këtë forum dhe njësoj kishte vepruar edhe presidenti i Serbisë, Aleknsandar Vuçiq.
