Lideri i lëvizjes demokratike, Izet Mexhiti ka reaguar pasi MPB mori në bisedë informative, Visar Ganiun dhe Bilall Kasamin.
“Kryetari i Çairit, Visar Ganiu dhe ai i Tetovës, Bilall Kasami, u ftuan nga ana e policisë në biseda informative, kurse arsyeja e vetme paska qenë qëndrimi i kryeministrit të Kosovës, Albin Kurti, në Shkup e Tetovë. Kjo metodë staliniste me biseda informative, të cilën, në kohën e Jugosllavisë komuniste, më së shumti e kanë ndjerë shqiptarët, tregon se midis nesh akoma konsumohen recidivat e së kaluarës, por kësaj radhe edhe nga ana e disa shqiptarëve, të cilët pushtetin e kanë kuptuar si bahçe të babës. E gjithë kjo u bë nën ndikimin dhe presionin e politikës antishqiptare serbe, së cilës Albin Kurti i është bërë halë në sy. Gjithsesi, kjo situatë dëshmon se nuk kemi gabuar me vendosjen e emrit të Adem Demaçit në një prej rrugëve të kryeqytetit, sepse sot më shumë se gjithmonë kemi nevojë për frymën e tij të rezistencës” ka shkruar Mexhiti. (INA)
