“I dërgoj edhe një herë një ftesë publike qeverisë dhe kërkoj që të ulemi sa më shpejt për të rënë dakord për datat e zgjedhjeve të ardhshme presidenciale dhe parlamentare, dy procese kyçe”, theksoi kreu i VMRO-DPMNE-së, Hristijan Mickoski.
Ai tha se qëndrimi i VMRO-DPMNE-së është se nuk ka nevojë të shpenzohen miliona mjete shtesë për shkak të matematikës dhe kalkulimeve politike të politikanëve tashmë të mundur që janë pjesë e qeverisë së BDI-së dhe LSDM-së.
“I bëj thirrje dhe kërkoj arsye, sepse më e pakta që u duhet sot qytetarëve është frustrimi shtesë nga kombinatorika politike që po bën kjo qeveri, të ulemi. Jemi të gatshëm që menjëherë të biem dakord për datën e raundit të parë të zgjedhjeve presidenciale dhe për raundin e dytë të zgjedhjeve presidenciale që duhet të jenë bashkë me ato parlamentare. Çfarëdo date që ata zgjedhin, ne do ta mbështesim atë”, theksoi Mickoski.
Ai tha se nuk ka nevojë të harxhohen para shtesë apo siç nënvizoi dhjetëra miliona me të. cilat mund të bëhen kopshte, shkolla, asfalt, kanalizime, etj.
Mickoski shtoi se padyshim që partia në pushtet është e mposhtur dhe se për këtë e kupton pse duan ta zgjasin procesin, sepse çdo ditë për ta do të thotë tender më i negociuar privatisht.
“Ne jemi të gatshëm të bisedojmë sot dhe jemi të gatshëm t’i pranojmë këto dy data, raundin e parë presidencial dhe raundin e dytë presidencial bashkë me ato parlamentare, ato që do të thotë qeveria e BDI-së dhe LSDM-së. Ministria e Drejtësisë asnjëherë nuk ka caktuar datë dhe as nuk ka kompetencë të caktojë data”, tha Mickoski.
Sa i përket grupit punues në Ministrinë e Drejtësisë për kodin zgjedhor, Mickoski theksoi se ai grup punues është duke punuar për ndryshime të kodit, të cilat sërish do të vijnë në procedurë parlamentare dhe VMRO-DPMNE si parti politike do të bëjë një vendim i bazuar në ato ndryshime që do t’i marrin si propozim.(INA)
