Ministri i ri i drejtësisë, Krenar Lloga në një takim të sotëm me gazetarët ka theksuar se pa mbështetjen ndërkombëtare nuk ka në plan të bëj “vetting” në drejtësi apo siç njihet si proces për rivlerësimin e gjykatësve dhe prokurorëve.
“Në ministri nuk ka asnjë dokument që lidhet me vettingun, nuk ka asnjë shkronjë. Ne jemi të mendimit që duhet të ketë një vetting. Në këtë vetting duhet të përfshihen BE dhe SHBA. Nëse ata nuk janë pjesë e këtij procesi, ne nuk do ta nisim”, deklaroi ministri Lloga.
Duke folur për “vetting”-un që u zhvillua në Shqipëri, ai theksoi se Maqedonia është larg Shqipërisë për sa i përket krimit në gjyqësor, pra sipas tij, është në një nivel shumë më të mirë. Lloga tregoi gjithashtu se është takuar me zyrtarë nga Shqipëria për të parë se çfarë takti kanë përdorur për vettingun.
I pyetur nëse do të ketë një rizgjedhje të përgjithshme të gjyqtarëve pas vettingut, Lloga shtoi se tani nuk është koha për këtë çështje, duhet të diskutohet.
“Çdo gjë për të thënë është shumë herët. Të gjitha partitë politike janë të përkushtuara, nëse të gjithë janë të këtij qëndrimi, atëherë do të jetë e lehtë”, deklaroi ministri i drejtësisë.(INA)
