Prishtinë, 12 qershor 2025 – Në 26-vjetorin e Çlirimit të Kosovës, ministri i Mbrojtjes Ejup Maqedonci ka kujtuar ditën historike të 12 qershorit 1999 si një pikë kthese për popullin shqiptar dhe fillimin e epokës së shtetndërtimit. Në një postim publik, Maqedonci përshkroi emocionet dhe kujtimet nga ato ditë, kur së bashku me bashkëluftëtarët e Ushtrisë Çlirimtare të Kosovës të Zonës Operative të Llapit hynë në Prishtinë dhe u takuan me trupat britanike.
“U bënë 26 vite, prej kur më 12 qershor 1999, Kosova u çlirua nga Serbia pushtuese,” shkroi Maqedonci. Ai përmendi figurat emblematike të historisë kombëtare – nga Hasan Prishtina dhe Shaban Polluzha, te Adem Demaçi dhe Adem Jashari – duke theksuar se ëndrra e tyre për liri u bë realitet në qershorin e vitit 1999.
Ministri theksoi frikën e madhe që ekzistonte në ditët e fundit të luftës, se Serbia mund të kryente masakra të reja gjatë tërheqjes së saj nga Kosova. Ai kujtoi edhe krimet e rënda të kryera gjatë luftës: dhjetëra mijëra të vrarë, përfshirë fëmijë, qindra mijëra të dëbuar, si dhe dëmet e mëdha materiale dhe kulturore të shkaktuara nga forcat serbe.
“Shumë shokë, luftëtarë të UÇK-së kishin rënë dëshmorë duke paguar me jetën e tyre për lirinë tonë… Mijëra shtëpi, ndërtesa kulti, biblioteka dhe monumente kulturore ishin shkatërruar,” theksoi ai, duke shtuar se plagët e luftës ende rëndojnë shoqërinë dhe vendin.
Në përfundim të mesazhit të tij, Maqedonci theksoi rëndësinë e ruajtjes së lirisë dhe kultivimit të kujtesës historike kolektive. “Ne e kemi fituar lirinë, e cila duhet ruajtur dhe mirëmbajtur çdo ditë, çdo kund, nga secili sipas detyrës dhe përgjegjësive të tij.”
Ai uroi qytetarët për Ditën e Çlirimit, duke e cilësuar atë si një nga ngjarjet më madhore në historinë moderne të Kosovës. (INA)
