Në prag të sfidës së shumëpritur ndaj Serbisë më 7 qershor në “Arenën Kombëtare”, Mirlind Daku ka dërguar një sinjal të qartë për trajnerin Sylvinho: ai është gati për Kombëtaren.
Sulmuesi kuqezi ishte protagonist absolut në ndeshjen mes Rubin Kazan dhe Khimki, duke realizuar dy gola, edhe pse skuadra e tij u mund me rezultatin 3-2. Daku shënoi fillimisht në minutën e 12-të, duke barazuar rezultatin 1-1, ndërsa më pas gaboi nga pika e bardhë në minutën e 43-të, duke humbur një mundësi të artë për të kaluar skuadrën në epërsi. Gabimi nuk e ndali: në minutën e 58-të, ai shënoi golin e dytë personal, duke kaluar përkohësisht Rubin Kazanin në avantazh.
Pavarësisht disfatës së ekipit, paraqitja e Dakut ishte një tjetër dëshmi e formës së tij të mirë në këtë sezon. Me 13 gola të shënuar në 28 javë, ai është golashënuesi i dytë më i mirë në ligën ruse, vetëm 3 gola larg vendit të parë.
Në një kohë kur konkurenca në repartin ofensiv të Kombëtares shqiptare është e fortë, Daku ka zgjedhur mënyrën më të mirë për të bërë zë: me gola. E ndërsa ftesa për dy ndeshjet vendimtare ndaj Serbisë dhe Letonisë nuk është ende zyrtare, vetë sulmuesi duket se ka bërë të vetën në fushën e lojës. Tani radha është e Sylvinho-s.
B.T (Dosja.al)
