Mjeku nga Vallandova, Daniel Kirovski ka shkuar në pikën kufitare midis Bullgarisë dhe Rumanisë për t’iu ofruar ndihmë mjekësore refugjatëve nga lufta në Ukrainë, ku situata po përshkallëzohet dhe po detyron gjithnjë e më shumë njerëz të largohen nga shtëpitë e tyre.
Shoqata Kombëtare e Vullnetarëve ka mbledhur mbi 70 mjekë, duke përfshirë edhe doktor Kirovskin nga Vallandova, të cilët vullnetarisht dhe pa pagesë ekzaminojnë dhe ofrojnë ndihmë mjekësore për refugjatët nga rajonet e krizës në Ukrainë, të cilët mbërrijnë në qendrat e pritjes në kufirin midis Bullgarisë dhe Rumanisë.
-Nga rrugëtimi i gjatë dhe i mundimshëm, refugjatët zakonisht kanë probleme me alergji, sëmundje të frymëmarrjes dhe diarre, por shumë prej tyre kanë sëmundje onkologjike dhe reumatizmale. Shpresojmë që kjo luftë të përfundojë sa më shpejt, e bashkë me të edhe vuajtja e refugjatëve, tha dr. Kirovski.(INA)
