Zjarri i cili ka rënë para disa ditësh në territorin e Mariovës së Prilepit ka eskaluar gjatë ditës së djeshme, njoftoi drejtori i Qendrës për Menaxhimin e Krizave Stojançe Angellov. Ai tha se në një moment vija e zjarrit ishte më e gjatë se 20 kilometra. Siç informoi Angellov për këto arsye është takuar Shtabi i Krizave të Komunës së Prilepit dhe për ditën e sotme janë dakorduar më shumë masa dhe aktivitete.
“Herët në mëngjes në vendin e zjarrit kanë arritur 25 pjesëtarë të njësisë speciale -tigrat, 70 pjesëtarë të ushtrisë, 40 punonjës të Pyjeve Kombëtare dhe më shumë se 60 zjarrfikës. Më shumë se 195 profesionistë janë në zonën rurale. Për shkak të dukshmërisë së zvogëluar, tymit të dendur, përdorimi i helikopterit nuk është i mundur. Edhe air-traktori nuk do të mund të funksiononte nëse nuk përmirësohen kushtet”, deklaroi Angellov.
Në territorin e shtetit gjatë ditës së djeshme ka pasur gjithsej 27 zjarre, nga të cilat 4 janë aktive, 2 janë nën kontroll dhe 21 janë shuar plotësisht. Përveç zjarrit në Mariovë dhe rrethinë, zjarri është aktiv edhe në komunën e Çashkës, në malin Mukos. Zjarr aktiv ka edhe në komunën e Çuçer Sandevës dhe në territorin e komunës së Dollnenit, njofuan nga Qendra për menaxhim me kriza .
Vera e këtij viti si pasojë e temperaturave të larta dhe piromanëve ka qenë përplot zjarre me të cilat vrullshëm janë ballafaquar zjarrëfikësit dhe përfaqësuesit e ndryshëm të policisë, armatës etj.
