Ministria e Brendshme iu bëri thirrje qytetarëve që deri në fund të vitit të pajisen me patentat e shoferit me emrin e ri kushtetues të vendit. Gjatë vizitës së tij në stacionin policor “Prolet”, Ministri Pançe Toshkovski, tha se edhe pse me shtyrjen e vlefshmërisë për patentë shoferët deri në fund të vitit, kishte kohë të mjaftueshme që qytetarët t’i ndërronin dokumentet, megjithatë një numër i madh i qytetarëve ende nuk e kanë bërë këtë.
“Në periudhën e ardhshme prej një muaji, do të pasojë një fushatë nga Ministria e Brendshme, përmes së cilës ne do t’u bëjmë thirrje të gjithë atyre që nuk kanë rinovuar patentën e tyre të shoferit, ta rinovojnë atë për të marrë një të re, pasi nuk ka më turma, kështu që ne do të përqendrohemi veçanërisht në këtë, kërkoj nga të gjithë qytetarët që kanë patentë shoferi me emrin e vjetër kushtetues, derisa ato janë të vlefshme, t’i ndryshojnë ato”, deklaroi Pançe Toshkovski, Ministër i Brendshëm.
Toshkovski gjithashtu tha se, ndryshe nga disa muaj më parë, turmat janë zvogëluar dhe njoftoi se pasi të dorëzohet një kërkesë, qytetarët tani do të jenë në gjendje të marrin dokumentet personale brenda dy javësh.
“Nga kjo javë e tutje, çdo shtetas i Maqedonisë që dorëzon një kërkesë për të marrë një pasaportë të re, patentë shoferi, letërnjoftim, secila nga ato dokumente personale, do të jetë në gjendje t’i ushtrojë ato në kuadër të së drejtës ligjore të përcaktuar brenda ligjit, e cila është brenda 15 ditëve”, u shpreh Pançe Toshkovski, Ministër i Brendshëm.
Thuajse më shumë se një vit, qytetarët janë përballur me probleme për të marrë dokumentet personale me emrin e ri kushtetues të vendit, në kohën e duhur. Sipas të dhënave të Ministrisë së Brendshme, deri më tani në vend janë ndryshuar 1,750,000 pasaporta, 1,450,000 karta identiteti dhe mbi 750,000 patentë shoferi. /Alsat.mk
