Ministria e Punëve të Brendshme në Maqedoninë e Veriut njoftoi se ka dorëzuar kërkesë për inicimin e procedurës penale kundër komunës së Tetovës dhe Çairit si dhe ndaj kryetarëve të tyre Bilall Kasami dhe Visar Ganiu, përcjell INA.
“Sot, Ministria e Punëve të Brendshme, më saktësisht Departamenti i Policisë Kriminale, Departamenti për Krime të Përgjithshme dhe të Dhunshme, në koordinim me Departamentet për Punë të Brendshme Shkup dhe Tetovë, kanë dorëzuar kërkesa deri te gjykatat themelore kompetente për inicimin e procedurës kundërvajtëse ndaj subjekteve Komuna Çair dhe Komuna e Tetovës dhe ndaj personave përgjegjës kryetarëve të këtyre komunave V.G. dhe BK”, njoftoi Ministria e Punëve të Brendshme.
Policia njoftoi se gjatë vizitës së kryeministrit të Kosovës nuk është respektuar ligji për përdorimin e stemës, flamurit dhe himnit, edhe ate gjatë ceremonive të organizuara në të dyja komunat.
MPB theksoi se po vijon kërkimet për personin që valëviti flamurin e “Shqipërisë së Madhe” në njërën prej këtyre manifestimeve dhe pas gjetjes së tij do të ngrihet kallëzim penal përkatës.(INA)
