Në një ditë historike për Selinë e Shenjtë, me rastin e zgjedhjes së Papës Leoni, përfaqësuesi politik dhe diplomatik Muharrem Salihu realizoi një vizitë zyrtare në Vatikan, ku u prit nga Imzot Peter Rajič, Nunc Apostolik dhe njëherazi Dekan i Trupit Diplomatik të akredituar pranë Republikës së Italisë.
Takimi, i zhvilluar në ambientet e Selisë së Shenjtë, u karakterizua nga një atmosferë e thellë shpirtërore dhe me ton të lartë diplomatik. Palët diskutuan mbi rëndësinë e dialogut ndërfetar dhe bashkëpunimit ndërkombëtar, në frymën e vlerave universale të paqes, tolerancës dhe mirëkuptimit mes popujve.
“Në këtë ambient të jashtëzakonshëm pata privilegjin të pritesha nga Shkëlqesia e Tij, Imzot Peter Rajič. Një takim me domethënie të thellë, ku dimensioni diplomatik bashkohet në mënyrë të natyrshme me vlerën universale të besimit,” deklaroi Salihu pas takimit.
Vizita merr një dimension të veçantë për shkak të përkimit me zgjedhjen e Papës së ri, Leoni, duke i dhënë kësaj ngjarjeje një simbolikë të dyfishtë: shpirtërore dhe ndërkombëtare. Në këtë kontekst, pranimi i Salihut nga një prej përfaqësuesve më të lartë të diplomacisë në Vatikan vlerësohet si një mesazh i qartë në mbështetje të bashkëpunimit dhe respektit reciprok mes komuniteteve dhe institucioneve ndërkombëtare.
