Në Shkup sot u realizua forumi për investime dhe tregti mes Maqedonisë së Veriut dhe Republikës së Turqisë, forum i cili mblodhi së bashku kompani nga të dy vendet dhe ofroi një platformë të shkëlqyer për rrjetëzim, shkëmbim idesh dhe eksplorimin e mundësive të reja për bashkëpunime.
Kryetari i OEMVP-së, Mendi Qyra në fjalimin e tij potencoi angazhimin e vazhdueshëm të Odës për të forcuar lidhjet ekonomike mes dy vendeve dhe rëndësinë e shkëmbimit tregtar dhe partneriteteve me kompanitë turke.
“Shkëmbimi tregtar mes Maqedonisë së Veriut dhe Turqisë vazhdon të rritet, duke reflektuar angazhimin për të forcuar lidhjet ekonomike mes dy vendeve. Gjatë periudhës nga janari deri në korrik të vitit 2024, eksporti arriti në 94,5 milionë euro, ndërsa importi në 422,6 milionë euro. Këto të dhëna tregojnë potencialin e madh për rritje të mëtejshme në tregtinë tonë me Turqinë”, theksoi Kryetari Qyra gjatë fjalimit të tij.
Forumi ofroi edhe mundësi rrjetëzimi për kompanitë e Maqedonisë së Veriut dhe Turqisë, ku u përfshinë të gjitha sektorët. Në B2B morën pjesë edhe disa kompani anëtare të OEMVP-së, të cilët përfaqësuan interesat e sektorit të biznesit nga Maqedonia e Veriut. Oda Ekonomike e Maqedonisë Veri-Perëndimore vazhdon të mbështesë bizneset vendore në ndërtimin e partneriteteve ndërkombëtare, duke u ofruar atyre mundësi për të zgjeruar veprimtarinë e tyre dhe për të zhvilluar marrëdhënie të reja bashkëpunimi me tregje të rëndësishme.(INA)
