Në oborrin e Shkollës së Mesme Tekstile në Tetovë u zbulua sot murali i futbollistit të Kombëtares Shqiptare, Nedim Bajrami. Në ceremoninë përuruese morën pjesë përfaqësues të Komunës së Tetovës, si dhe vetë futbollisti Bajrami, i cili u shpreh i lumtur që ndodhet në qytetin e tij të origjinës.
“Jam shumë i gëzuar që ndodhem sot në Tetovë. Ky mural është një nder për mua dhe një motivim për të vazhduar më tej,” deklaroi Bajrami.
Nga ana tjetër, kryetari i Komunës, Bilall Kasami, theksoi rëndësinë e këtij momenti simbolik. “Ky është një çast i veçantë për ne. Përmes këtij murali duam t’u tregojmë të rinjve se suksesi është i mundur – me përkushtim dhe punë të ndershme,” u shpreh Kasami.
Murali i Bajramit vjen si pjesë e një nisme më të gjerë për të promovuar figura pozitive dhe për të frymëzuar brezat e rinj nëpërmjet shembujve të suksesit.(INA)
