Artan Lame, ish-kreu i Kadastrës dhe figurë e njohur publike shqiptare, është ndarë nga jeta në moshën 58-vjeçare. Ai ndërroi jetë në një spital në Mynih, Gjermani, pas një ndërhyrjeje të vështirë në zemër nga e cila nuk mundi të rikuperohej .
Lame ka mbajtur poste të larta shtetërore, përfshirë drejtimin e Agjencisë së Legalizimit dhe më pas të Kadastrës, si dhe ka qenë aktiv në radhët e Partisë Socialiste. Ai njihej gjithashtu si publicist, studiues i historisë shqiptare dhe veprimtar për mbrojtjen e trashëgimisë kulturore .
Lajmi i ndarjes së tij nga jeta ka shkaktuar trishtim të thellë në opinionin publik. Kryeministri Edi Rama reagoi me një mesazh ngushëllimi, duke thënë:
“I pabesueshëm, po fatkeqësisht i vërtetë lajmi i befasishëm i ndarjes nga jeta të Artan Lames. Jam pa fjalë. Ngushëllime Mirelës, djalit e vajzës së tyre dhe familjes e shokëve të përbashkët”.
Artan Lame lindi në Tiranë në vitin 1967, gjatë karrierës së tij ai dha një kontribut të çmuar për zhvillimim dhe avansimin e shoqërisë shqiptare. (INA)
